ລວມອາຫານທີ່ຄວນກິນ ແລະ ຫຼີກລ້ຽງໃນຊ່ວງເປັນປະຈຳເດືອນ

ຜູ້ຍິງຫຼາຍຄົນອາດຈະຮູ້ສຶກບໍ່ສະບາຍຕົນໂຕໃນຊ່ວງມີປະຈຳເດືອນ ເຊິ່ງອາຫານບາງຊະນິດຊ່ວຍບັນເທົາອາການໄດ້ແຕ່ກໍ່ມີບາງຢ່າງທີ່ຄວນຫຼີກລ້ຽງ ຫຼືກິນໃນປະລິມານທີ່ເໝາະສົມເພື່ອປ້ອງກັນບໍ່ໃຫ້ໄປກະຕຸ້ນອາການຊ່ວງເປັນປະຈຳເດືອນໃຫ້ມີຜົນເສຍຫຼາຍກວ່າເກົ່າ ດັ່ງນັ້ນຫາກທ່ານມີອາການເຈັບທ້ອງ ເຈັບຫົວ ປວດຮາກ ອ່ອນເພຍ ທ້ອງອືດ ແລະ ອາລົມແປປວນ ລອງເພີ່ມອາຫານຈຳພວກນີ້ລົງໄປໃນຄາບອາຫານຈະຊ່ວຍໃຫ້ຮູ້ສຶກດີຂື້ນ



ນ້ຳ



ຢ່າງທີ່ຮູ້ຈັກກັນດີຢູ່ແລ້ວວ່າການດື່ມນ້ຳເປັນສິ່ງທີ່ສຳຄັນໂດຍສະເພາະຢ່າງຍິ່ງໃນຊ່ວງທີ່ເປັນປະຈຳເດືອນ ເພາະການດື່ມນ້ຳທີ່ພຽງພໍຈະຊ່ວຍຫຼຸດຜ່ອນອາການເຈັບຫົວເຊິ່ງເປັນອາການທົ່ວໄປທີ່ພົບໄດ້ເມື່ອມີປະຈຳເດືອນ ນອກຈາກນີ້ຍັງຫຼຸດອາການບວມນ້ຳ ແລະ ທ້ອງອືດໄດ້ນຳ


ຜັກໃບຂຽວ


ເປັນເລື່ອງປົກກະຕິທີ່ລະດັບທາດເຫຼັກຈະຫຼຸດລົງໃນມື້ນັ້ນຂອງເດືອນ ໂດຍສະເພາະຢ່າງຍິ່ງຖ້າປະຈຳເດືອນມາຫຼາຍເຊິ່ງອາດຈະເຮັດໃຫ້ອ່ອນເພຍ ອ່ອນເພຍ ປວດເມື່ອຍຕາມຮ່າງກາຍ ແລະ ວິນຫົວ ການກິນຜັກໃບຂຽວ ເຊັ່ນ: ຜັກກາດນາ ຜັກຕຳລືງ ຜັກບົ້ງ ຜັກຫົມ ຈະຊ່ວຍເພິ່ມລະດັບທາດເຫຼັກ ແລະ ວິຕາມິນບີ ແລະ ຄວບຄຸມປະຈຳເດືອນໃຫ້ມາເປັນປົກກະຕິ


ໝາກໂມ



ໃນຊ່ວງເປັນປະຈຳເດຶອນແນະນຳໃຫ້ກິນໝາກໄມ້ທີ່ມີນ້ຳຫຼາຍຢ່າງເຊັ່ນ ໝາກໂມ ເພາະໃນໝາກໂມມີທັງນ້ຳ ແລະ ລົດຊາດຫວານອ່ອນໆ ຈາກທຳມະຊາດ ເຊິ່ງຈະຊ່ວຍລົດຄວາມຢາກນ້ຳຕານ ແລະ ທົດແທນການຮັບນ້ຳຕານທຽມທີ່ບໍ່ດີຕໍ່ສຸຂະພາບ


ຂິງ


ນ້ຳຂິງ ຫຼື ຊາຂິງອຸ່ນໆໜຶ່ງຈອກສາມາດຊ່ວຍບັນເທົາອາການທີ່ບໍ່ດີຊ່ວງມີປະຈຳເດືອນໄດ້ດີ ເພາະຂິງມີສັບພະຄຸນຕ້ານການອັກເສບ ຈຶ່ງຊ່ວຍຫຼຸດຜ່ອນອາການປວດເມື່ອຍຕາມຮ່າງກາຍ ເຖິງຢ່າງໃດກໍ່ຕາມບໍ່ຄວນກິນຂິງຫຼາຍເກີນໄປເພາະອາດເຮັດໃຫ້ເກີດອາການເຈັບທ້ອງໄດ້


ຊັອກໂກແລັດດຳ


ຂອງວ່າງທີ່ທັງແຊບ ແລະ ມີປະໂຫຍດຢ່າງຊັອກໂກແລັດ ທີ່ປະກອບໄປດ້ວຍທາດເຫຼັກ ແລະ ແມກນີຊຽມເຊິ່ງແມກນີຊຽມຈະຊ່ວຍຫຼຸດຜ່ອນຄວາມຮຸນແຮງຂອງອາການຜິດປົກກະຕິທີ່ເກີດຂື້ນກ່ອນມີປະຈຳເດືອນ (PMS symptoms) ເຊັ່ນ: ລະຄາຍເຄຶອງ, ໂສກເສົ້າ, ນອນບໍ່ຫລັບ, ເຈັບເຕົ້ານົມ ຢາກອາຫານເປັນຕົ້ນ


ໂຍເກິດ


ຜູ້ຍິງຫຼາຍຄົນຕິດເຊື້ອຢີສລະຫວ່າງ ຫຼື ຫຼັງມີປະຈຳເດືອນເຊິ່ງອາດກໍ່ໃຫ້ເກີດອາການຄັນ ແລະ ອັກເສບຕາມມາ ການກິນອາຫານທີ່ອຸດົມໄປດ້ວຍໂປຣໄບໂອຕິກ (Probiotics) ຢ່າງໂຍເກິດ ຈະຊ່ວຍເພີ່ມແບັກທີເລຍຊະນິດດີໃຫ້ກັບຈຸດຊ້ອນເລັ້ນ ແລະ ຕໍ່ຕ້ານການຕິດເຊື້ອດັ່ງກ່າວໄດ້


ອາຫານທີ່ຄວນຫຼີກລ້ຽງ


ອາຫານທີ່ຄວນຫຼີກລ້ຽງ ຫຼື ບໍລິໂພກແຕ່ພໍດີໃນຊ່ວງມີປະຈຳເດືອນ ໄດ້ແກ່ ເກືອ ນ້ຳຕານ ກາເຟ ເຫຼົ້າເບຍ ແລະ ອາຫານເຜັດ ເພາະກຸ່ມອາຫານເຫຼົ້ານີ້ຫາກກິນຫຼາຍເກີນໄປຈະເຮັດໃຫ້ຮ່າງກາຍບວມນ້ຳ ເຊິ່ງຈະເຮັດໃຫ້ມີອາການທ້ອງອືດ ເຈັບຫົວ ແລະ ເຈັບທ້ອງຫຼາຍກວ່າເກົ່າ


ອາການທີ່ເກີດຂື້ນໃນຊ່ວງມີປະຈຳເດືອນສາມາດບັນເທົາລົງໄດ້ດ້ວຍການເລືອກກິນ ແລະ ຫຼີກລ້ຽງອາຫານບາງຊະນິດ ແຕ່ຖ້າຫາກພົບວ່າມີອາການເຈັບປວດຫຼາຍຈົນຜິດປົກກະຕິ ແນະນຳໃຫ້ໄປພົບແພດ ເພາະນັ້ນອາດເປັນສັນຍານຂອງບັນຫາສຸຂະພາບຢ່າງອື່ນທີ່ອາດເປັນຫຼາຍກວ່າພຽງແຕ່ອາການມີປະຈຳເດືອນ

13 views0 comments