ເປີດໂຕ Nubia Red Magic 7S ແລະ 7S Pro ເກມມິງເຮືອທົງ, ຊິບ SD 8+ Gen 1, ລະບາຍຄວາມຮ້ອນໄດ້ດີຍິ່ງຂື້ນ!

ເມື່ອເດືອນກຸມພາທີ່ຜ່ານມາ Nubia ໄດ້ເປີດຕົວສະມາດໂຟນເກມມິງ Red Magic 7 ທີ່ມາພ້ອມຊິບ Snapdragon 8 Gen 1 ແລະລ່າສຸດ Nubia ໄດ້ປະກາດເປີດຕົວສະມາດໂຟນເກມມິ່ງລຸ້ນໃໝ່ Red Magic 7S ແລະ Red Magic 7S Pro ທີ່ມາພ້ອມຊິບ Snapdragon 8+ Gen 1


 


ນອກຈາກທັງ 2 ລຸ້ນຈະໃຊ້ຊິບຕົວທ໋ອບຈາກ Qualcomm ແລ້ວຍັງມາພ້ອມລະບົບພັດລົມລະບາຍຄວາມຮ້ອນ (cooling fan) ທີ່ຈະຊ່ວຍໃຫ້ລົດອຸນະພູມຂອງຊິບປະມວນຜົນ ລວມເຖິງອຸນະພູມຂະນະທີ່ສາກແບັດເຕີລີ່ ໂດຍ 7S ແລະ 7S Pro ໄດ້ຮັບການປ່ຽນດີຊາຍພັດລົມໃຫ້ເປັນດີຊາຍຄ້າຍຄີບສະຫຼາມ ທີ່ຈະຊ່ວຍເພີ່ມແຮງດັນອາກາດສຳລັບການລະບາຍຄວາມຮ້ອນແລະຍັງຊ່ວຍລົດສຽງໃຫ້ໜ້ອຍລົງກວ່າລຸ້ນກ່ອນອີກດ້ວຍ


ໜ່ວຍຄວາມຈຳຂອງ Red Magic 7S ຈະມີຕົວເລືອກຄ່ອນຂ້າງຫຼາຍ ໄດ້ແກ່ ແຣມ LPDDR5 8GB/12GB/16GB ແລະ ໜ່ວຍຄວາມຈຳ UFS3.1 128GB/256GB/512GB

ໃນຂະນະທີ່ Red Magic 7S Pro ຈະມີຕົວເລືອກໜ່ວຍຄວາມຈຳທີ່ດີຂື້ນໄປອີກ ໄດ້ແກ່ ແຣມ 12GB/16GB/18GB ແລະ 256GB/512GB/1TB

ສຳລັບການສາກນັ້ນ 7S ຈະໃຊ້ແບັດເຕີລີ່ 4,500 mAh ຮອງຮັບການສາກໄວເຖິງ 120W ໃນຂະນະທີ່ Pro ຈະມີ ແບັດເຕີລີ່ຂະໜາດໃຫຍ່ກວ່າທີ່ 5,000 mAh ແລະ ຮອງຮັບການສາກໄວທີ່ 135W ສາມາດສາກ 0-50% ໄດ້ພາຍໃນ 5 ນາທີ ແລະສາມາດສາກ 0-100% ໄດ້ພາຍໃນ 15 ນາທີ


ທາງດ້ານໜ້າຈໍ Red Magic 7S ແລະ 7S Pro ຈະມີສະເປກເຊັ່ນດຽວກັບລຸ້ນກ່ອນໜ້າ ໂດຍເປັນໜ້າຈໍ AMOLED 10-bit ຂະໜາດ 6.8 ນີ້ວ ຄວາມລະອຽດ 1,080 x 2,400 ພິກເຊວ ໂດຍ 7S ຈະມີອັດຕາລີເຟດສູງສຸດ 165Hz ຕອບສະໜອງຕໍ່ການສຳພັດ 720Hz ໃນຂະນະທີ່ 7S Pro ຈະມີອັດຕາລີເຟດ 120Hz ແລະມີຄວາມສາມາດໃນການຕອບສະໜອງຕໍ່ການສຳພັດທີ່ 960Hz


ສາເຫດທີ່ 7S Pro ມີອັດຕາລີເຟດນ້ອຍກວ່າ 7S ເປັນເພາະ 7S Pro ມາພ້ອມກ້ອງເຊວຟີ່ໃຕ້ໜ້າຈໍ ເຮັດໃຫ້ລຸ້ນນີ້ແທບຈະບໍ່ມີພື້ນທີ່ຂອບຈໍ ເຊີ່ງແຕກຕ່າງກັນ 7S ທີ່ກ້ອງເຊວຟີ່ຈະເຊື່ອງຢູ່ບໍລິເວນຂອບດ້ານເທີງເໜືອຈໍຂື້ນໄປອີກ


Red Magic 7S Pro ມີລາຄາເລີ່ມຕົ້ນຢູ່ທີ່ 5,200 ຢວນ (ປະມານ 28,000 ບາດໄທ) ແລະຈະມີການວາງຂາຍນອກປະເທດຈີນ ໃນຂະນະທີ່ Red Magic 7S ຄາດວ່າຈະວາງຂາຍສະເພາະໃນປະທດຈີນເທົ່ານັ້ນ


1 view0 comments